Eskolako jaialdiak ere, mugikorrik gabeko arnasgune?

Atalak: Haurren haziera, Hezkuntza

Mugikorrekiko kontzientzia bizi-bizi den garaiotan, etengabe argazkiak eta bideoak ateratzen dituzten gurasoz beteko al dira urte bukaerako eskola-jaialdiak, aurten ere? Mugikorrez eta irudien erabileraz bizpahiru gogoeta.

Batez ere guraso elkarteek sustatu dute mugimendua: seme-alabei mugikorra ahalik eta gehien atzeratzeko olatua izan zen lehenik, mugikorraren kalteak hizpide (menpekotasuna, sare sozialak, zenbait eduki… tarteko), eta mugikorrak ikasgeletatik ateratzeko aldarria izan da ondoren: gero eta gehiago dira beren burua “mugikorrik gabeko arnasgune” izendatu duten ikastetxeak.

Hori horrela, eta gazteenen eredu garen helduok eredugarri ere izan behar badugu, ez al genuke mugikorra gordeta eta itzalita izan behar, sikiera ikastetxeko atea gurutzatzen dugunean? Urte bukaerako oporren harira eskola gehientsuenetan egingo diren jaialdi, ospakizun eta ekitaldietan, bisitarioi ere ez al ligukete eskatu behar mugikorra (argazkiak eta bideoak) beste baterako uzteko?

Guraso bisitarioi ere ez al ligukete eskatu behar mugikorra (argazkiak eta bideoak) beste baterako uzteko?

Ikasle eta irakasleen argazkiak, WhatsAppean bolo-bolo

Beste gai bat ere gurutzatzen du aferak. Gure irudiak mundu digitalean zabaltzeak dituen inpaktu eta ondorioez, gure irudiaren gaineko kontrol eta kontzientziaren garrantziaz nerabeak hezten gabiltzan garaiotan, gogoetatzen al dugu guk –eskolako nahiz etxeko helduok– adin txikikoei ateratzen diegun argazki mordoen eta horien erabileraren inguruan? Ikastetxe batzuetan bai, ari dira horretan lanean, eta neurritzat hartu dute adin txikikoei argazkirik ez ateratzea. Guraso bisitarioi ez al ligukete neurri bera ezarri behar?

Hain justu, irakasleek ikasleei ateratako argazkiez blogean jardun nuelarik, Jon Hernandezek iruzkina utzi zuen, eskoletako jaialdiak eta irakasleen irudi eskubideak mintzagai: “Irakasleei ez die inork baimenik eskatzen argazkietan ateratzeko, eta hortik dabiltza WhatsApp eta Instagram taldeetan edonork ikusteko moduan, irteerak edo jaialdiak dauden egun horietan. Izan ere, familiek ez dute arazorik irakasleak argazkietan harrapatzeko. Beraien seme-alaben argazkietarako baimena ez dute sinatzen, baina gero patioko jaialdian telefonoa ateratzeko eta dauden haur eta irakasle guztiei argazkiak ateratzeko ez dute arazorik. Ea gero zein animatzen den guraso horri telefonoa gordetzeko eskatzera”.