Lolo Rico ‘La Bola de Cristal’ telebista saio iraultzailearen sortzaileaz dokumentala

Atalak: Hedabideak

Umeak (orokorrean herritarrak) tentelak bailiran tratatzen dituzten telebista saioetatik aldendu eta ikusleari errespetuz hitz egin zion, duela 30 urte, La Bola de Cristal saio aurrerakoiak. Zorrotza, kritikoa, konprometitua eta hezitzailea, bestelako telebista posible zela frogatu zuen saioaren sortzaile eta zuzendari Lolo Ricok.

Irudian, La Bruja Avería. Donostiako Koldo Mitxelenan emango dute “Lolo Rico: La mirada inventada” lanaren aurrestreinaldia.

Haurrentzako saioa izan arren, gazte eta helduei ere zuzendua zegoen TVEko programa: Espainiako Estatuko agintariekin itzulingururik gabe sartzen ziren edota Karl Marx-en Kapitala panpinen bidez azaltzen zuten. “La Bola de Cristal saioaren mezua askatasuna zen”, dio Ricok. Iritzi propioa eta irudimena lantzera eta, paradoxikoki, telebista gutxiago ikustera eta gehiago irakurtzera bultzatzen zituen ikusleak, pentsaraztea abiapuntu eta helburu. “Ez dago hori baino biolentzia handiagorik: pertsona bat tenteltzat hartzea”.

Uztailaren 3an, Koldo Mitxelenan

Madrilen jaioa baina “euskalduna bokazioz”, Lolo Rico protagonista duen dokumentalaren aurrestrainaldirako Donostia aukeratu dute. Uztailaren 3an, 19:00etan, Koldo Mitxelenan emango dute Lolo Rico: La mirada no inventada lana, La Guerrilla Comunicacional irabazi asmorik gabeko produktorak egina. Telebistako zuzendari izateaz gain, haurrentzako ipuinen idazlea, gidoilaria eta irratian aritua ere bada Rico.

Lolo Rico: “Adierazpen askatasuna dagoela dirudien arren, sistema den bezalakoa onartu behar da”.

“Ezkertiarrak ginen, baina ez genuen inor doktrinatzeko ahaleginik egin”

Alaska, La Bruja Avería edota Electroduendes pertsonaien bidez, mezu indartsuak zabaldu zituen La Bolak. “Nik ezin izan ditut inoiz nire bizitza profesionala eta nire konpromiso ideologikoa, politikoa eta soziala bereiztu. Ez dut ulertzen jendeak ondo pasatzea bakarrik dibertsioarekin, beste guztia kenduta. La Bolak horixe frogatu zuen: posible zela erakustea eta dibertitzea. Ezkerreko talde bat ginen, ez genuen disimulatu, baina inoiz ez genuen inor doktrinatzeko ahaleginik egin. Ezin genuen egin eskuinari kritikatzen genion gauza bera”, kontatu zion Ricok ARGIAri.

Gaur egun egin ahalko litzateke saioa? “Ez da interesatzen jendeak pentsatzea”

TVEren zentsurak jasan bazituzten ere, gaur egun ezinezko edo gutxienez politikoki desegoki izango liratekeen edukiak eman zituzten. Egun, Lolo Ricoren hitzetan, “adierazpen askatasuna dagoela dirudien arren eta kritika egin daitekeela dirudien arren, sistema den bezalakoa onartu behar da eta benetan adierazpen askatasuna baliatzen baduzu, edozer gerta dakizuke. Lana ere galdu dezakezu”. Are gehiago, “beldur naiz orain inori ez zaiola interesatzen jendeak pentsatzea”.

“Gizakiak esnatu egin behar du. Beste mundu bat posible da”

ARGIAn garbi utzi zuen: “Jaio nintzen bezala hilko naiz ni. Espiritu gogotsu eta borrokalaria duen ezkerra nahi dut. Garbi dago kapitalismo basati hau dena suntsitzen ari dela. Natura txikitu du, bakea eragozten du, gerrak ekartzen ditu eta gizakia robotizatu nahi du. Gizakiak esnatu egin behar du. Beste mundu bat posible da”.

Dokumentalaren trailerra: