Mehatxuak mehatxu, emakume bideojoko-zaleen topaketek badute data

Atalak: Generoa

Emakumeei bakarrik zuzendutako jardunaldiak izateagatik hainbat gizonen boikot eta eraso mehatxuak jaso ostean, bideojokoak eta generoari buruzko Bartzelonako topaketak bertan behera utzi zituen enpresa kudeatzaileak, ekitaldiaren segurtasuna ezingo zuela bermatu iritzita. Marina Amores egitasmoaren bultzatzaileak ez du amore eman eta beste leku bat aurkitu du, mehatxuak berpiztu diren arren.

Zergatik ez topaketa mistoa?

“Gaiari buruz hitzaldiak eman izan ditut eta publiko artean beti egon da gizon talde bat etengabe nire hitzak auzitan jartzen, gutxiesten eta boikotatzen. Bideojokoen munduko emakumeok gure esperientziez lasai eztabaidatzeko antolatu ditut topaketa hauek, espazio libre eta seguru bat izateko, eta ez gizonak erasotzeko”, kontatu du Amoresek. Bideojokoena oso mundu maskulinizatua dela eta –tartean on-line jokoek ematen duten anonimotasuna baliatuz– jarrera matxisten inpunitatea handia dela gaineratu du Amoresek.

Gaming Ladies topaketak iragarri eta sufritutako jazarpenaren ondorioz, Amoresek Twitter kontua itxi behar izan zuen. Orain, beste babesle bat lortu eta Mediapro Aretoan egingo dute ekitaldia, hilaren 27an; 250 emakumek izena eman dute dagoeneko. Data berria eman eta erreakzioak hasi dira berehala: gizonak diskriminatzeagatik Bartzelonako Udalaren aurrean salaketa jarriko duela adierazi du gizon batek, baina dirudienez gizon honek ez daki Bartzelonako Udala bera jarri zela Amoresekin harremanetan, topaketentzat leku berri bat aurkitzeko.

Gaiari lotuta:

– Gizonik gabeko musika jaialdia, “behar bezala jokatzen ikasten duten arte”