Euskara teknikarien feminizazioa

Atalak: Sailkatu gabea

Elhuyarrek (Eusko Jaurlaritzaren enkarguz) euskara teknikarien feminizazioari buruzko ikerketa egin du. Bertan, administrazio publikoan zenbat emakume eta zenbat gizon ari diren euskara zerbitzuetan lanean aztertzen da, baita horien adina, posizio hierarkikoa eta abar. Ondorioak begi bistakoak ziren: hau da, gure lanbide hau (eragile publiko zein pribatuetan, nahiz eta azken hori ez aztertu) feminizatuta dagoela ondorioztatzen da, bi heren emakumezkoak diren heinean. Jakina, beste hainbat datu ere jasotzen ditu ikerketak: administrazio publiko handietan (Jaurlaritza eta aldundiak) gizon gehiago ari da (batez bestekotik gora, emakumeak han ere nagusi diren arren), postuetan gora egin ahala gizonezko gehiago agertzen dela, eta abar.

Zeharo interesgarria iruditu zait ikerketa, baina … Baina asko jarri dakizkio ikerketa honi. Nik, batez ere, batean jarriko dut arreta. Datuak eta datuak jasotzen dira, argazki xehea ageri da ikerketan. Baina ez da horren ondorioetan sakontzen (hemen, argi gera dadin ez dudala ezer ikerketa egin dutenen aurka, kontrakoa baizik, enkargu bat da eta enkargua eman duenaren gainean jarri gurako nuke ardura).

Izan ere, zer esan gura du lanbide bat feminizatuta egotea? Zer dakar horrek? Zer egin daiteke egoera horri buelta emateko? Zein da “gizonak” erakartzeko formula? Zein da lanbideari prestigioa emateko egin beharko litzatekeena? Ikusten duzuenez, galderak eta galderak, eta erantzun zailekoak guztiak. Baina azalean geratu gura ez badugu (azken finean, gure lanbidea ezagutzen duen inori ez zaizkio ondorioak arrotzak egingo), egin beharrekoak guztiak eta aztertu eta ikertu beharrekoak. Espero dut aurrerantzean horiei ere ekiteko ikerketak mahai gainean jartzea eta honetan sakontzeko bideei ekitea.