Taloa

Atalak: Sailkatu gabea

Leire Lisonek Taloa eta ziborga: euskararen biziberritzea sistema sozio-digitalean izeneko Master Amaierako Lana egin du 2026an. Zeharo interesgarria iruditu zait eta hango gauza batzuk ekarri nahiko nituzke hona.

Ondorioetatik hasiko naiz (ez da biderik zuzenena, baina ….). Honako hau dio Leire Lisonek bere lanean:

Biziberritze prozesu garaikideak digitalizazioaren ohiko praktika teknokapitalista hegemonikoak gainditu behar ditu.

Eta, noski, gainditzeko bide horretan burujabetza teknologikoa eta software librea dira gako, bere ustez.

Beste kontu batzuekin jarraitzeko, Leirek kale erabileraren neurketei eta inkesta soziolinguistikoei buruz egiten du berba. Eta aipatzen du bi ikerketa horiek euskal subjektu-hiztunaren nolakotasuna errepresentatzen dutela. Baina errepresentazio horiek ez dituzte hiztunen erabilera guztiak neurtzen (bera erabilera digitalaz ari da, noski). Eta honako hau gehitzen du:

Asmoa ez da hainbeste plataforma digitalean inkesta soziolinguistikoak abiatzea, ezpada identifikatzea zein espaziotan eta zein elkartruketan euskara eta euskal kulturaren bestelako adierazpideak sortzen ari diren.

Izan ere, Leire Lisonek planteatzen du agian galderak aldatu behar direla. Zein da galdera: nola biziberritu euskara ala non biziberritzen ari da dagoeneko euskara? Uste dut biak behar ditugula, baina agian bigarren horri kasu gutxiegi egin diogula orain arte eta hori ere garrantzitsua izan daitekeela aurrera begira.

Hortaz, non biziberritzen ari da dagoeneko euskara?

PD: Leire Lisonen laneko tituluko ziborga berba ulertzen da, baina Taloa akaso ez. Taloa ez da bakarrik arto irinaz jaten dugun hori, ez. Taloak esan nahi du: there are lots of alternatives, eta, jakina, kontrajartzen zaie alternatibarik ez dagoela esaten duten horiei. Taloa: hirugiharra eta esperantza.