Markel Olano: “Bidegin dirua zuzen erabili zela diot publikoki, baina hori zeinek erabaki behar du?”

2015-05-11  //  Azpiegiturak, Ekonomia, Politika  //  Iruzkinik ez

Xabier Olanorekin (EH Bildu) izandako aurrez aurrekoan hautagai jeltzaleak adierazi du “agenda iluna” dagoela “EAJren irudia zikintzeko”. Mahai-ingurua gaur 21:00etan egongo da ikusgai ARGIAren webgunean. (gehiago…)

“Herri memoria josteko tresna homologatua sortu nahi dugu”

2015-05-07  //  Historia  //  Iruzkinik ez

Jadanik sarean erabilgarri dago Euskal Memoria fundazioaren dokumentazio gunea. Oraingoz, gatazkaren eta errepresioaren ondorioz hildako 500 pertsonaren espedienteak daude kontsultagai. Memoria historikoa berreskuratzeko “tresna iraunkorra” dela esan digute. (gehiago…)

Joxe Arregiren kasuaren espedientea aurkitu dute

2015-04-29  //  Historia, Politika  //  Iruzkinik ez

Joxe Arregiren gopurari ateratako argazkiek tortura agerian utzi zuten. Juan Kruz Unzurrunzagak egin zituen ezkutuan, ‘Berria’ri duela gutxi aitortu zionez.

Torturaz hildako zizurkildarrari buruzko informazioa Madrilen aurkitu dute Euskal Kriminologia Institutuko ikerlariek. 34 urteren ondoren kasua oraindik guztiz argitu gabe dago.

ARGIAren azken zenbakian elkarrizketa egin dio Ander Leon kolaboratzaileak Laura Pego Euskal Kriminologia Institutuko abokatu eta ikerlariari. Jakinarazi duenez, 1981ean torturen ondorioz hildako Joxe Arregi ETAko kidearen espedientea aurkitu dute Madrilgo fundazio batean. Honela azaldu du Pegok:

“Torturaren gaia aipatuta, guztioi Joxe Arregiren izena datorkigu burura. Bere kasuaren espedientea aurkitu dugu Madrilgo fundazio batean artxibaturik. Kopia bat eskuratzear gaude eta laster ekingo diogu azterketari”.

Ikerlariek zuhurtziaz jokatu dute eta espedientea eskuetan izan arte ez dute aurkikuntzari buruzko datu gehiago eman nahi izan.

Eusko Jaurlaritzak 2014an agindu zion Euskal Kriminologia Institutuari azken mende erdian izandako tortura kasuez ikerketa abiatzeko, Bake eta Bizikidetza planaren barruan. Ikertaldeak 3.587 tortura salaketa bildu ditu (pdf) oraingoz. Pegoren esanetan, orain horietako 200 bat kasu aukeratu eta egiaztatze fasearekin hasiko dira, horretarako Istanbulgo Protokoloa aplikatuko dute.

34 urte Arregiren kasua argitu gabe

Joxe Arregi Izagirre 1981eko otsailean atxilotu zuen Polizia Nazionalak eta 9 egunez torturatua izan ondoren Carabanchelgo espetxeko ospitalean hil zen. “Oso latza izan da” esan omen zien hil aurretik espetxean zeuden hainbat preso politikori.

Bere gorpu ubelduari hilerrian ezkutuan ateratako argazkiek haizatu zuten zizurkildarraren tortura kasua eta Espainiako Barne ministro Juan José Rosónek “tratu txarrak” onartu beste aukerarik ez zuen izan. Hala ere, ondorengo urteetan epaituak izan ziren poliziak absolbituak izan ziren edota zigor oso arinak jaso zituzten.

Harrez geroztik otsailaren 13a torturaren aurkako eguna izan ohi da Euskal Herrian eta hainbat ekitaldi egiten dira Arregiren heriotzaz gain beste tortura kasuak ere salatzeko.

Aurten ere Zizurkilen torturatuen omenez egindako Barnekanta eskulturaren aurrean bildu ziren senide eta lagunak –ARGIAk azalera ekarri du oroigarriaren irudia– eta bertan salatu zuten Joxe Arregi oraindik ez dela ageri “erakundeen zerrendetan biktima moduan”. Kasuak argitu gabe jarraitzen duela gogorarazi eta “egia osoa” jakitea ere aldarrikatu zuten.

Zizurkilen egin zen ekitaldiaren irudiak Tolosaldeko Atariaren eskutik:

Espainiako Bankua eta Kutxabank pribatizazioaz hitz egiteko biltzear dira

2015-04-24  //  Ekonomia  //  Iruzkinik ez

Xabier Iturbe (Kutxa), Gregorio Villalabeitia (Kutxabank), Xabier Sagredo (BBK) eta Fernando Aranguiz (Vital). Espainiako Bankuarekin biltzekotan dira aurki. (Argazkia: Argazki Press / Marisol Ramirez)

El Mundoren arabera, Espainiako Bankuak hitzordua bertan behera uztea erabaki du, haren berri medioetan filtratu ostean. Kutxabanken kontrola mantendu ahal izateko erreserba-funtsa zehaztu behar dute. (gehiago…)

Islandiarren eta euskaldunen arteko berradiskidetzea, baleazaleen sarraskiaren IV. mendeurrenean

2015-04-20  //  Historia  //  Iruzkinik ez

1615ean baleak harrapatzera joandako 32 euskaldun hil zituzten Islandian. Gaur hasiko da hori gogoratzeko kongresua eta, besteak beste, haien ondorengoek berradiskidetze ekitaldia egingo dute. (gehiago…)

Mario Fernández: “Kutxabankek ez dio euro bakar bat ordaindu Cabiecesi”

2015-04-17  //  Uncategorized  //  Iruzkinik ez

Abokatu bufete baten estalkia erabili zuen Fernandezek Cabiecesi 243.000 euro ordaintzeko, fiskalak salatu duenez.

Bankariak Rafael Alcorta abokatuari egotzi dio ilegaltasuna, “fakturak berak emititu” zituelako.

Auzitegi kanpoaldean egindako adierazpen esanguratsuetatik harago, Mario Fernandez Kutxabankeko presidente ohiak bere defentsaren norabidea zein izango den erakutsi du epailearen aurrean inputatu gisa deklaratu ondoren.

Fernandezen esanetan, Alcorta abokatua izan zen Kutxabanken minutak kobratu zituena, eta beraz, berari dagokio azalpenak ematea: “Kutxabankek ez dio euro bakar bat ere ordaindu Cabiecesi”, dio bankariak.

Fernandezek berak aitortua duenez, baina, Mikel Cabieces Espainiako Gobernuko delegatu ohiari hilero 6.000 euroko soldata ordaintzeko modu hoberena, abokatu bufetearen bidez egitea zela esan zioten Kutxabankeko Giza Baliabideetako arduradunek, eta honek baimena eman zuen.

Hain justu, gaur Giza Baliabideetako zuzendari Fernando Lopez de Eguilazek hitz egingo du lekuko gisa epailearen aurrean, baita finantza entitatearen Auditoria Zerbitzuetako zuzendari Roberto Moll-ek ere. Kutxabankek egindako barne auditoriak dio Alcortari egin gabeko lanengatik ordaindu zaiola.

Delitu sozietarioagatik epaitua izan daiteke orain Fernandez, hirugarren subjekjtu baten estalkia erabiliz bankuarenak ziren 243.000 euro Cabiecesi emateagatik.

Egia eta memoriaren transmisioan sakonduko dute Villabonan aste osoz

2015-03-23  //  Historia  //  Iruzkinik ez

Aritza Kultur Elkarteak ekitaldi sorta zabala antolatu du martxoaren 24tik 31ra. Tartean, Goyo Armañanzas mediku-psikiatraren tailerra, “isiltasuna apurtzeko espazio bat sortzeko”.

Egia jakiteko nazioarteko eguna da martxoaren 24a, Nazio Batuek hala izendatuta. Eta egun hori aukeratu dute Aritza Kultur Elkarteko kideek Memoriaren Asteari hasiera emateko. Esti Amenabarro pedagogoak Frankismoaren aztarnak arakatzen II: egiaren minak liburua aurkeztuko du, hain justu. (gehiago…)

Lan erreformaren bi ondorio: prekarietate gehiago, lan gatazka gutxiago

2015-03-04  //  Ekonomia  //  Iruzkinik ez

Bilboko udalak azpikontratazioetan prekarietatearen aurkako klausula sozialak bete ditzala eskatzeko bilkura (arg.: LAB)

Sindikatuek salatu dute lan merkatuan inoiz baino prekarietate handiagoa dagoela. Aldiz, Lan Harremanen Kontseiluak emandako azken datuen arabera, gatazkek %60 egin dute behera EAEn urtarrilean. (gehiago…)

Kutxabankek Cabiecesi egindako ordainketak isilean eduki nahi izan zituen

2015-02-27  //  Ekonomia  //  Iruzkinik ez

Gregorio Villalabeitiaren esanetan Espainiako Bankuak behartu zuen auzia publiko egitera.

Kutxabankeko presidente Gregorio Villalabeitiak Cabieces auziari buruzko azalpenak eman ditu prentsaurrean. Esan du finantza entitatearen presidentzia hartu eta “ordu gutxitara” izan zuela Mario Fernandezek agindutako ordainketa irregularren berri, eta administrazio kontseiluan erabaki zutela 243.000 euroak berreskuratuz gero kontua publiko ez egitea, bankuaren “izen ona” mantentzearren. Baina Espainiako Bankuak derrigortu zuen, “hitzez eta idatziz”, informazioa fiskalaren esku uztera.

Hain justu, arrazoi bera erabili du orain Villalabeitiak arlo judizialean pauso gehiago ez emateko eta Fernándezen kontra akusazio bezala ez aurkezteko. Bere esanetan, dirua itzulita galera ekonomikorik ez dago, eta nahi duen bakarra da auzitik aldentzea “ez digulako ezertan laguntzen”.

Villalabeitiak argitu ez duena da zergatik uste duen kasua auzitegian ikertzeak ez duela laguntzen. Kutxabankek irabaziak izan zituen 2014an, zehazki 150,3 milioi euroko etekinak, eta %13,3 ratioa dauka momentu honetan. Baina bezeroen gaineko komisioak ez balitu handitu eta probisioek ez balute %5 behera egin, etekin horiek askoz gutxiago lirateke.

Bestalde, Kutxabank osatzen duten hiru banku-fundazioek (BBK, Kutxa eta Vital) modu kontzertatuan ala bananduta jarduten duten erabaki behar du Espainiako Bankuak laster. Erabaki inportantea da –batez ere bankuan gehiengoa duen BBKrentzat–, jabetzari eusteko erreserba funtsa 700 milioi eurokoa edo 300 milioi eurokoa izan daiteke horren arabera, eta aldea dago.

Cabieces auzia zorrozki jarraitu duten Vocento taldeko periodikoek behin baino gehiagotan aipatu dute ustezko ustelkeriak ez diola batere onik egiten Kutxabanki, “momentu okerrenean” azaleratu omen delako, justu Madrilek erabaki hori hartu behar duenean: “Espainiako Bankua eta Europako Banku Zentrala ez dira bromatan ibiltzen” zioen El Diario Vascok otsailaren 8ko papereko edizioan.

Baina zeinen arabera hartuko dute erabakia? Irizpide teknikoak erabiliz edo politikoagoa dirudien “izen onaren” balizko ranking bat begiratuz? Badirudi finantza boterea –establishmenteko medioaren laguntzarekin– beltzezko gizonen mamua haizatu nahian dabilela auzi honetan duen erantzukizunari iskin egiteko.

Lemoatxeko miliziano errepublikarra, iluntasunetik argira

2015-02-23  //  Historia  //  Iruzkinik ez

Lemoatxen 1.000 lagun baino gehiago hil ziren 1937ko maiatza amaieran eta ekaina hasieran, errepublikarren kontraeraso eta faxisten abiazioaren bonbapean. Lemoatx 1937 elkarteak Lemoako Memoria izeneko bideoan –postprodukzioa Atomika Studiok egina da– ordukoa bizi izan zuten hainbat lagunen testigantzak jaso ditu. (gehiago…)