Galdera desbideratuak artaldea zuzentzeko

2014-11-30  //  Hedabideak, Iritzia  //  Iruzkinik ez

Frente Atleticoko neonaziek beste pertsona bat hil dute. Galiziarra izan da oraingoan. Aitor Zabaleta labankadaz hil zutela 16 urte bete dira. Sinets genezake kirol-afera soila dela. Edo ez.

Azkar sartu dira ohiko hedabide nagusiak herritarrak hunkituta dauden une hauetan artaldearen norabidea markatzera. Partidua bertan behera uzten saiatu da Liga, jakinarazi digu Marcak. Partidua bertan behera utzi behar al zuen LFPk?, galdetu digute inkesta interaktiboetan zertaz pentsatu behar dugun erabakitzen dutenek. Jardunaldi osoa utzi behar al da bertan behera? ausartagoek. Sare sozialetan jendea honi buruz ari da eztabaidan.

“Distrakzioa: Informazio hutsalekin jendearen arreta desbideratu, audientzia ez dadila kezkatu gai garrantzitsuekin”, dio Chomskyk idatzitako manipulazioaren 10 arauetako batek.

Eta testuingurua zein da? Eskuin muturreko taldeak ugalduz doaz Espainian, Nicolas Txikiz ari diren hedabideek esaten ez badigute ere. Eta eskuin muturrak funtzio zehatza dauka egungo sisteman: beldurra hedatuz bestelako gizarte bat eraiki nahi dutenak desaktibatzea. Egungo kapitalaren interes berak. Kanpotik garbiago ikusi ohi denez, hor da Grezia adibidez, begirau nahi dionarentzat.

Galdera proposamen bat behin hona iritsita: Talde faxistak onartu behar al ditu estatuak? Zer erantzungo/eskatuko luke jendeak?

Milaka pertsona atera dira mundu osoan Kobaneren alde, Bilbon ere bai

2014-11-03  //  Kurdistan  //  Iruzkinik ez

Kobane hiri kurduaren aldeko manifestazioak egin dituzte mundu osoan. Bilbon ere manifestazioa egin dute eta Komite Internazionalistak bideo eder honetan jaso du.

Kobane Siriaren menpeko Kurdistanen dago, hiru aldetatik Estatu Islamikoak inguratuta dauka eta laugarrenean, Turkiarekin muga egiten du. Egoera kritikoan daude eta 40 egun daramatzate erresistentzian. (gehiago…)

Kobaneren aldeko munduko martxa larunbatean, Bilbon manifestazioa

2014-10-28  //  Kurdistan  //  Iruzkinik ez

Bilboko manifestazioaren kartela.

“Kurdistango herriaren aurkako sarraskia gelditu! Estatu Islamikoa inperialismoaren tresna” lemapean, elkartasun manifestazioa deitu dute larunbatean Bilbon. 12:00etan abiatuko da udaletxetik eta Herri Kurduaren Elkartasun Ekimenak deitu du mundu mailako elkartasun egunaren baitan. Kobane (Rojava) Estatu islamiarraren eskuetan ez erortzeko borrokan ari den Kurdistango lurraldea da, Siriako estatuaren menpe dagoena, Turkiako estatuarekin mugan. Mundu mailako arreta deitu du (beranduegi?) kurduak praktikan jartzen ari diren balore aurrerakoiengatik.

Atxikimendu kanpaina abian jarri dute, eta jende erreferente ugarik egin du bat dagoeneko. Horien artean dira Bakearen Nobel Saria jasotako jendea (Desmond Tutu edo Adolfo Perez Esquivel), edo Noam Chomsky gisako pentsalari  aurrerakoiak. (gehiago…)

2014an nazioartean zentsuratutako albiste nagusiak

2014-10-20  //  Aktibismoa sarean, Komunikazioa  //  Iruzkinik ez

Argitaratu dute Censored 2015 urtekaria, albistegietara heldu ez diren albisteak jasoz. 2013-2014 artean Mendebaldeko hedabide nagusiek isildu dituzten albiste garrantzitsuenak bildu dituzte. AEBei oso zuzendua egon arren (Kalifornian egiten dute 1976tik), albiste potoloak dira. Batzuk ekarri ditugu hona, informazio eskubideari ekarpena egin asmoz:

· Ozeanoen azidifikazio azkarra itsasoko bizitza arriskuan jartzen ari da.

Gauza jakina da erregai fosilen erabilerak CO2a jaurtitzen duela airera. Ez horrenbeste gas horren %25a ozeanoek xurgatzen dutela. (Info+)

(gehiago…)

Israelek BDS kanpainako ekintzaile erreferentea atxilotu du, besteak beste

2014-10-15  //  Desobedientzia zibila, Estaturik gabeko nazioak, Palestina  //  Iruzkinik ez

Faruk Ashur, Israelek atxilotu duen ekintzailea.

Israelgo armadak Hebronen Faruk A’shur atxilotu du. Urriaren 8an izan zen AIC guneak informatu duenez, eta hiru hilabeterako atxiloketa administratiboa ezarri diote.

“Ekintzaile erreferentea da Israelgo produktuei boikota sustatzeko antolatutako komite lokaletan, batez ere Hebronen eta Zisjordanian”, irakur daiteke AICn. A’shur optikaria da eta aldi berean, “Hebrongo auzo txiro eta marjinatuetako biztanleekin zerbitzu hobeak lortzeko lan nekaezina egin izanagatik da ezaguna”.

Kolonoen bortxakeria salatzen eta Israelgo armadaren erasoen biktimekin aritu izan da luzez. Existitzea erresistitzea da leloa bere egin duen herri honetan, esfortzu horiek bereziki garrantzitsuak dira, beren eguneroko bizitza aurrera ateratzeko dituzten zailtasunei aurre egin eta laguntza jasotzen duten familiek bertan bizitzen jarrai dezaten.

Hebrongo Defentsa Komitea mugimendu sozial eta alderdi politikoen arteko koalizioa da, Hebrongo herritarrak Israelgo praktika kolonialengandik babesteko. A’shurren berehalako askatasuna eskatu du, beste 6.500 preso politiko palestinarrenarekin batera.

Egun 480 bat palestinar daude atxiloketa administratibopean, hau da, inongo epaiketarik edo frogarik gabe kartzelan. Praktika abusibo hori askotan salatu dute nazioarteko Giza Eskubideen aldeko eragileek.

Hebron, okupazioaren isla latza

Palestinako herri honetako biztanleek bizi duten egoera lazgarriaren erakusle dira Hebrongo Defentsa Komitearen Facebook orrian azken hilabetean jarri duen albiste sorta. Ondoren zerrendatuta eta loturekin jarriko ditugu, ideia bat egiteko.

Irailak 19: Israelgo kolonoek artzain palestinarrei eta ekintzaile internazionalistei eraso egin diete.

Irailak 21: Israelgo armadak zortzi eta hamaika urteko bi haur atxilotu ditu eskolara sartzera zihoazela.

Irailak 23: Israelgo armadak bi palestinar hil dituela jakinarazi du. Israeldarrek diote Marwan Qauasmi eta Amer Abu Eshi direla, 2014ko ekainaren 12an hiru kolono bahitu eta hiltzea akusatzen diete.

Irailak 24: Zisjordanian kontsumitzen duten Israelgo produktu bati boikota sustatzeko irudi bat.

Irailak 25: Ikasle palestinarrak atxilotu ditu Hebronen Israelgo armadak.

Irailak 28: Esnekiak egiten zituzten fabrika palestinarra suntsitu dute Israelgo hondeamakinek.

Irailak 30: Olibondoak babesteko jarritako hesi baten suntsiketaren harira, istiluak kolono eta palestinarren artean.

Urriak 10: Israelgo poliziaren operazioa Al Aqsa mezkitan.

Urriak 11: Ekintzaile baketsu israeldarrei eraso egin diete kolonoek, armada begira dutela.

Urriak 12: Israelgo armadak haur bati bizikleta konfiskatu dio.

Urriak 14: 200 kolono Hebron hegoaldeko Yatta parkean sartu dira armadak babestuta eta bertan zeuden palestinarrak bota dituzte.

Bretainian herri kontsultak abiatuko dituzte lurraldetasuna jorratzeko

2014-10-01  //  Bretainia  //  Iruzkinik ez

Bretainiaren bateratzearen aldeko manifestazioa.

Azaroan Bretainiaren batasunari buruzko herri kontsultekin hasiko direla adierazi du 44=Breizh taldeak. Ar-Naoned/Nantesen antolatzaileen arabera 35.000 pertsona pertsona batu ostean jakinarazi dute pausoa. Herri zeltiar honetan lurraldetasunaren inguruko borrokan daramatzate 40 urtetik gora, izan ere, Bretainiatik bereizita dagoen Loire Atlantique departamendua berriro Bretainiako parte izan dadin eskatzen dute. Frantziako Estatuak Bretainia eskualdetzat lau lurraldetan mugatu zuen II. Mundu Gudaren ostean, bostgarrena den Ar Naonedekoa kanpo utzita. (gehiago…)

Eskoziako independentziaren aldeko bideoak

2014-08-27  //  Eskozia, Estaturik gabeko nazioak  //  Iruzkinik ez

Eskoziako independentziaren kanpaina berotzen ari da. Hiru asteren faltan, BBC katean emandako azken eztabaida, inkesta guztien arabera Alex Salmondek irabazi ostean, animoz indartzen ari dira indepentziazaleak. Sarean ere independentziaren aldeko bideoak ez dira falta, eta hemen bilduko ditugu batzuk.

Lehenengo honetan, erreferendumaren egunean jaioko den haurra mintzo da.

(gehiago…)

John Holloway: “Kapitalismoaren eskematik at sortutako zirrikituetan sakondu behar dugu”

2014-08-26  //  Borroka teknikak, Desobedientzia zibila  //  Iruzkinik ez

John Holloway.

John Holloway elkarrizketatu dute eldiario.es gunean. 2002an argitaratu zuen “Change the World without taking the power” liburuak eztabaida dexente sortu zuen. Egoera aldatzeko, ez du sinesten Estatu mailan botere instituzionala eskuratzea denik gakoa, baizik eta gizarte kapitalistaren aurkako eguneroko ekintza txikietan du esperantza. Antiboterea deitzen die. Joan den uztailean, Urola Kostako Hitzak ongi jaso duenez, Azkoitiako Bagaudia taldeak soziologo eta filosofo irlandarraren Kapitalaren aurka eta haratago. Eztabaida ireki bati buruzko gogoetak liburuaren mamia euskaratu eta editatu du.

Ostegunean Donostiara datorren Amador Fernández-Savaterrek elkarrizketa egin dio, San Jeronimo kaleko Udal Liburutegian berarekin solasteko aukera izango da 19:00etan hasita. Hollowayrekin egindako elkarrizketatik hainbat pasarte dauzkazu ondoren. (gehiago…)

Block the Boat: Israelgo itsasontziak blokeatzea helburu AEBetan Palestinaren alde

2014-08-25  //  Borroka teknikak, Desobedientzia zibila, Estaturik gabeko nazioak, Palestina  //  Iruzkinik ez

Manifestariak Oaklanden portua blokeatzen.

Abuztuaren 16tik Israelgo Zim konpainiako itsasontzien aurkako blokeo kanpainan ari dira AEBetan, Palestinaren aldeko ekintzaileak. Lehenik, Zim Piraeus ontziaren aurkako blokeo kanpaina abiatu zuten Oaklanden, eta deskargatzea astebetez atzeratu dute, portuan piketeak egin eta itsasoan geldirik edukiz. Block the Boat ekimeneko kideek jakinarazi dute Zim konpainiako ontzi gehiagoren aurka egingo dutela, eta Los Angeles, Tacoma eta Seattle-ko portuetan blokeoak prestatzen ari dira. Israelen aurkako BDS boikot kanpainaren barnean kokatzen dute ekintza eta galera ekonomiko handiak eragiten ari dira itsasontzia horrenbeste denboraz geldi edukita. (gehiago…)

‘Orain da unea’, Katalunian egingo duten Diada eguneko V erraldoiari begira

2014-07-24  //  Estaturik gabeko nazioak, Herrialde Katalanak  //  Iruzkinik ez

Irailaren 11n V erraldoi batekin azaroko kontsulta egin eta irabazi nahi dutela adieraziko dute milaka eta milaka kataluniarrek. Oraindik ere asko entzuten ez badugu ere gaiaren berri, dagoeneko kanpainan bete-betean sartu dira. Ireki dituzte izen emateko aukerak, eta itxura guztien arabera, beste mobilizazio erraldoi baten aurrean gaude. Ara és l’Hora izenarekin bataiatu dute kanpaina: Orain da unea. Mobilizaziorako dei eginez idatzi duten manifestu ederra daukazue euskaratuta bideoaren azpian.

Manifestua

ANC eta Òmnium Cultural elkarteak osatzen ditugun gizon eta emakumeok “Orain da Unea” kanpaina bultzatzen ari gara, 2014ko azaroaren 9an egingo dugun Kontsulta irabazteko. Gizarte zibil katalana osatzen duten gainontzeko erakundeei, antolakuntza politikoei, sozialei, ekonomikoei, eta herritar guztiei dei egiten diegu ondorengo puntuetan oinarritutako kanpainarekin bat egin dezaten. (gehiago…)

Malik eta tuaregek presoak trukatu dituzte bake elkarrizketen aurretik

2014-07-16  //  Azawad, Estaturik gabeko nazioak  //  Iruzkinik ez

Tuaregak beren bandera astinduz (Arg: Getty Images)

Maliko gobernuak eta Azawadeko tuaregek presoak trukatu dituzte bake elkarrizketen bezperan, borondate oneko keinu gisa.

BBCk publikatu du Azawaden zeuzkaten 45 soldadu maliar Bamakoko aireportura heldu direla, eta hauen lekuan, Bamako hiriburuan zituzten 41 tuareg sartu dituztela hegazkinean.

Mugimendua Aljeriako hiriburuan hasiko diren bake elkarrizketen bezperan etorri da, nahiz eta baikortasun handirik ez izan bi aldeek. Orain bi hilabete Maliko Gobernuak guda deklaratu zien berriz ere errebelde tuaregei, Frantziaren laguntzarekin.

Azken hilabeteotan MNLAk Azawaden parte handi baten kontrola bereganatu du.

Maiatzaren Plazako Amen elkartearen zapia Argentinako ikur nazional gisa izendatu dute

2014-07-03  //  Desobedientzia zibila, Memoria  //  Iruzkinik ez

Buenos Airesen Maiatzaren Plazako Amak manifestazioan.

Argentinako bandera, armarri nazionala eta ereserkiaren mailan jarri dute Maiatzaren Plazako Amen elkartearen ikurra. Argentinako Ikur Nazional izendatu du Diputatuen Ganberak zapi zuria, herrialdeko hedabideetan irakur daitekeenez. Diktadura garaian desagertutako seme-alabentzat justizia eske borrokan ari dira 37 urtez. “Memoriaren, egiaren, justiziaren eta giza eskubide guztien errespetua ordezkatzen ditu ikur honek”, adierazi dute diputatuek.

“Nahitaezkoa da herrialdeko sinboloen artean sartzea Maiatzaren Plazako Amen kideak ordezkatzen dituen zapi zuria, gure historia hurbileko mugimendu zentral baten adierazle gisa. Zapi hauek, dudarik gabe, dagoeneko ondare eta sentimendu herrikoiaren parte dira”, dio diputatuek onartu duten proiektuak. (gehiago…)

Hego Kurdistanek independentzia erreferenduma egingo du “hilabete batzuen buruan”

2014-07-01  //  Kurdistan  //  Iruzkinik ez

Iraken menpe dagoen Kurdistaneko lehen ministroak adierazi du BBCn independentzia erreferenduma egiteko asmoa dutela. Dagoeneko Irakeko estatua de facto zatituta dagoela eta kurduek beren etorkizuna erabakitzeko eskubidea dutela dio.

Joan den hilabetean, armada kurduak aurrez borrokan zeuzkaten lur eremuak hartu ditu, segurtasun indar irakiarrek hauek abandonatu ostean, ISIS indar islamiarren mugimenduen ondorioz. Horien artean dago petroleo erreserba handiak dauzkan Kirkuk ere. (gehiago…)

Israelen operazioa aurrera doa: 11 egunetan 471 palestinar atxilotu eta 5 hildako

2014-06-24  //  Palestina  //  Iruzkinik ez

Israelgo Armadako kideak haur bat atxilotzen (Arg: Al Akhbar)

Israelgo Armadak desagertuta dauden hiru israeldarren bila jarraitzen du Zisjordanian, kosta ahala kosta. 11 egunetan lau pertsona hil dituzte tiroz eta bosgarren bati operazioaren erdian bihotzekoak eman dio. Horrez gain, 471 palestinarretik gora atxilotu dituzte, horietatik 75 preso ohiak dira eta 2011n akordio baten ondorioz askatu zituzten. Hildakorik gazteenak 14 urte zituen eta zaharrenak 62. Tentsioa gora doa, eta hainbat iturritan irakur daiteke Israelek aurrez prestatutako operazioa izan litekeela, palestinarren batasuna ahuldu asmoz. (gehiago…)

Galeseraren aldeko “Korrika” lehen aldiz

2014-06-18  //  Gales  //  2 iruzkin

Galesen ere lehen aldiz egin dute “Korrika” Ras yr Iaith izenpean (hizkuntzaren lasterketa). Ekainaren 20an izan da, ostiralean eta 22 kilometroko ibilbidean bederatzi herritatik igaro da. Hemen beren webgunea.

(gehiago…)

Brasilgo anti-FIFA grafiti bilduma

2014-06-17  //  Komunikazioa  //  Iruzkinik ez

Hasi da Munduko Futbol Kopa Brasilen.

Herritarren parte handi bat ozeanoaz bestaldera begira dagoenean, legerik atzerakoienak aurrera ateratzeko une preziatua, gutxi batzuen negozio borobilak ixtekoa, eguneroko miseriez ahaztu eta milaka milioi euro irabazten dituzten pertsonak gurtzera iristekoa. Mundu hiper maskulino hori normaltasun osoz pertzibitzekoa. Hori eta askoz gehiago, hemen, etxean.

Futbol txapelketa nagusia beren herrialdean antolatzearekin zoratuta behar luketen brasildar askok Fuck FIFA diote ordea. Kaleak hartu dituzte azken urtean, txapelketa boikotatzeko deiak egin, atzerriko turistei beren herrialdera ez joateko erregutu diete. Zer gertatu da baina? Brasildarrek asmatu dutela beren aldarria era xinplean formulatu eta munduarekin partekatzen: “Ez dugu munduko koparik nahi, eskolak eta janaria baizik”.

Kapitalismo basatienaren sinboloetako baten aurka ahotsa altxatzea lortu dute, aurrekaririk gabeko egoera sortuz. Baina azken urtean hedabideetan lekua irabazi badute ere, behin txapelketa hasita, hobe akreditatutako 18.000 kazetariek estadio barruan gertatzen dena kontatzen badigute. Hor dago negozioa azken finean.

Hedabide handiak isildu direnerako, ordea, kaleak mintzo dira. Hemen sarean topatutako kale-artearen lagin bat.

(gehiago…)

Palestinar bat hil eta 150 atxilotu ditu Israelek, hiru kolonoren desagerketari erantzunez

2014-06-16  //  Estaturik gabeko nazioak, Palestina  //  Iruzkinik ez

Israelgo armada hiru kolonoen bila.

Tentsioa gora doa Palestinan. Joan den ostegunetik hiru kolono israeldar desagertuta daude, eta inork ezer adierazi ez badu ere, Israelgo Gobernuak argi du bahiketa izan dela. Egoerari erantzunez, sarekada zabala abiatu du eta iturri palestinarrek zabaldu dutenez, dagoeneko 150 pertsona atxilotu dituzte.

Sarekada egin bitartean enfrentamenduak izan dira armada eta harriak bota dizkieten gazteen artean, eta 20 urteko Ahmad Alsabarin tiroz hil dute Ramallan. Atxilotutakoen artean daude, Zisjordanian Hamasek duen zuzendaritzako 40 kideak, tartean Legebiltzarreko kideak eta abokatuak.

Israelgo Lehen Ministro Benjamin Netanyahuk larunbat gauean adierazi zuen hiru gazteak “bahituak” izan zirela eta Israelek hauek “aurkitu eta etxera eramango” zituela. “Gure mutilak talde terrorista batek bahitu ditu, dudarik ez”, adierazi zuen.

Guaranien buruzagi bat bahitu eta torturatu dute, Munduko Kopa hasteko 10 egunen faltan

2014-06-05  //  Estaturik gabeko nazioak, Guaraniak, Jatorrizko herriak  //  Iruzkinik ez

Valmir guarania bahitu egin zuten, zuhaitz bati lotu begiak estalita, eta torturatu egin zuten. (Arg: Survival)

Guaranien komunitateko lider indigena gazte bat bahitu eta torturatu egin dute astelehenean, Survival erakundeak zabaldu duenez. Bere kasuak irakurketa politiko nabarmena du, guaraniek beren lurretara itzultzeko egiten ari diren borrokan pieza gakoetako bat baita Valmir izeneko gaztea. Nísio Gomes, komunitateko buruzagia eta komunitatearen borrokaren sinboloetako bat zena, gaztearen aitaginarreba zen hil zuten arte eta Vlamir hilketaren lekuko izan zen: 2011n gertatu zen, aurpegia estalia zuten 18 pistolerok Gomesi eraso ziotenean.

(gehiago…)

Gose greban 41 egun daramatzaten 70 palestinar ospitalera bidali dituzte

2014-06-03  //  Palestina  //  Iruzkinik ez

5.271 preso palestinar dauzkate Israelgo kartzeletan. Horietatik 191 inongo epaiketarik gabe daukate atxilo, Palestinako presoen aldeko taldeek kontatu dituztenez.

70 preso palestinar eraman dituzte Israelgo ospitaletara igandean Midle East Monitor gunean irakurri dugunez. Inolako kargurik gabe atxilotuta dauzkatela salatzeko abiatu zuten baraualdia, asteartean 41 egun bete ditu. Guztira 5.000tik gora preso palestinar dauzkate Israelgo kartzeletan, eta hauetako askok atxiloketa administratiboen aurka elkartasun gose grebak abiatu dituzte. Hala ere, leku batean eta bestean kopuru ezberdinak irakurtzen dira, eta ezin zehatz jakin zer gertatzen ari den kartzeletan.

Astelehenean Europar Batasuneko kanpo politikako arduradun Catherin Ashtoni gose grebalari palestinarren bizitza salbatzeko eskatu diote Palestinako giza eskubideen aldeko 17 taldek.  Ashtoni idatzi dioten gutunean adierazten diote gose greban daudenpresoek bost astetik gora daramatzatela barauik.

Presoekin elkartasunez, hainbat herritan greba orokorra egin zuten. Hemen Nabluseko kronika jasotzen da.

Sare sozialetan #PalHunger etiketa erabiltzen ari dira, eta azpian bertan zirkulatzen ari diren zenbat irudi jaso ditugu.

Gose aske izan arte.

(gehiago…)

“Zapatistak ez daude bakarrik” nazioarteko aldarrikapena, irakasle baten hilketaren ondoren

2014-05-22  //  Jatorrizko herriak, Zapatistak  //  Iruzkinik ez

Sarean zabaldu diren irudiak.

Mundu osoan elkartasun ekintzak antolatu dituzte José Luis Solís López zapatistaren hilketa salatzeko. Galeano gisa ezagunagoa zen irakaslea, indar paramilitarrek hil zuten hilabete hasieran Txiapasen. Nazioarteko elkarte eta norbanakoek babesa eman diote komunitate zapatistari eta protestak antolatu dituzte: Mexikoko hainbat hiritan, Grezian, Txilen, Costa Rican, AEBetan, Argentinan eta Italian eragileek elkartasun komunikatuak argitaratu dituzte. Norbanakoen artean, besteak beste, Angela Davis, Noam Chomsky eta Naomi Kleinek babesa adierazi diete, batzuk aipatzearren. Euskal Herrian ere Txiapasekiko Elkartasun Sareak hilketa salatu du. (gehiago…)

Maliko Gobernuak guda deklaratu die berriz ere errebelde tuaregei, Frantziaren laguntzarekin

2014-05-21  //  Azawad, Estaturik gabeko nazioak  //  Iruzkinik ez

Kidaleko kaleetan MNLAko patruila batekin.

Gutxienez zortzi hildako izan dira Maliko armada eta gehienbat tuaregek osatzen duten MNLAren arteko borroketan, Kidal izeneko herrian (ikusi mapan non dagoen). Maliko lehen ministroak Azawadera egindako bisita batek lehertu du aurretik ere bero zegoen gatazka. Iturri tuaregetan irakur daiteke lehen ministroaren aurkako manifestazio baketsua egin zutela tuaregek, eta soldadu maliarrek haien aurka tiro egin zutela, azkenean MNLA berari ere eraso eginez. Azawaden Askatasunaren Aldeko Mugimendu Nazionalak (MNLA sigla frantsesetan) dio, erantzun egin zuela eta “guda presoak” dauzkala. Maliko lehen ministro Moussa Marak adierazi du bere herrialdea berriz ere “gudan” dagoela MNLAren aurka.

(gehiago…)

Bi palestinar hil eta hamaika zauritu ditu Israelgo armadak ‘Nakba’ egunean

2014-05-15  //  Palestina  //  Iruzkinik ez

Israelgo soldaduak Qalandian manifestari palestinarren aurka egiteko tokia hartzen. (Arg: Al Akhbar)

Israelgo polizia indarrek bi palestinar hil dituzte Ramallahn, Nakba egunaren 66. urteurrena oroitzeko manifestazioetan. Batek 17 urte zituen, eta besteak 22, eta Maan informazio agentzia palestinarrak mediku iturriak aipatuz jaso duenez, biak munizioa erabiliz bularrean jota hil dituzte. Beste hainbat pertsona balaz zauritu dituzte. (gehiago…)

Alaskako 20 hizkuntza indigenei ofizialtasuna aitortu diete, ekintza sinboliko gisa

2014-04-28  //  Alaskako herriak, Estaturik gabeko nazioak, Inuitak, Jatorrizko herriak  //  Iruzkinik ez

Hizkuntza indigenak ofizial egin zituzten saioa emozioz jarraitu zuten jatorrizko herrietako kideek.

Alaskako estatuak bertako hizkuntza propio edo indigenei ofizialtasuna eman die, AEBetan, Ktoo.org gunean irakurri dugunez. Hauek dira hizkuntzak: Inupiaq, Yupik siberiarra, Yup’ik Erdialdeko Alaskarra, Alutiiq, Unanga, Dena’ina, Deg Xinag, Holikachuk, Koyukon, Iparraldeko Kuskokwim, Gwich’in, Tanana, Iparraldeko Tanana, Tanacross, Hän, Ahtna, Eyak, Tlingit, Haida, eta Tsimshiarra.

Neurria onar zezaten presio egiteko, Legebiltzarraren kanpoan bilduta egon ziren herri indigenotako kide asko, eta neurria onartu zenean pozez lehertu ziren. Adinekoek prentsaren aurrean gogoratu zituzten gazte zirenean eskolan pairatu behar izan zituzten zigor eta umiliazioak. (gehiago…)

Aljeriako poliziak Kabylian ehunka amazigh atxilotu dituela salatu dute

2014-04-22  //  Amazighak, Estaturik gabeko nazioak  //  Iruzkinik ez

Amazighak protestan, polizia algeriarraren aurrean.

Kabyliako subiranotasunaren aldeko mugimenduak adierazi du ehunka pertsona atxilotu dituela Aljeriako poliziak. Kabylian gehiengoa amazigha da, Aljeria iparraldean. El Watan bertako egunkariak jaso duenez, bi egunez jarraian izan dira istiluak Tizi Ouzou hiriburuan. Kabyliako Autodeterminazioaren Aldeko Mugimendua (MAK frantsesez) eta Amazigh kulturaren aldeko hainbat mugimendu ari dira deialdiak egiten. Manifestariak Bouteflika aljeriar estatuko presidentearen berrautaketaren aurka ari dira eta Udaberri Amazigharen urteurrenarekin bat egin dute.

Hemen Youtubera igotako hainbat bideo.

(gehiago…)

Jaurlaritzak lehentasunezko bazkide izendatu du Israel

2014-04-09  //  Palestina  //  Iruzkinik ez

1- Israelek palestinarren oinarrizko Giza Eskubideak urratzen ditu, beste eragile askoren artean, Nazio Batuen Erakundeak dioenez. Ehunka kilometroko murrua eraikitzen jarraitzen du, asentamendu ilegalak, baliabide naturalen lapurreta, etxeen eraisketa eta eraso militar neurrigabeak.

2- Palestinarrek 50 urtez era guztietako erresistentzia praktikatu arren, Israelgo Gobernua ez da mugitzen. Hori aldatzeko aukera bakartzat, nazioarteari begira, boikot eta desinbertsio kanpaina abiatu zuten ekintzaile palestinarrek, BDS izenpean. Hamar urteren buruan, herritar, agintari eta gobernuak boikotarekin bat egiten ari dira (ikusi garaipen nagusiak). Netanyahuk berak esan du boikota “esponentzialki hazten ari dela” eta “Israelgo estatuarentzat arrisku nagusienetakoa” bilakatu dela. Palestinan izan berritan, berretsi dezakegu, bertako herritarren itxaropen iturri nagusi bilakatua da BDS kanpaina.

3- Eusko Jaurlaritzak Israel lehentasunezko bazkide izendatu duela irakurri dugu, Basque Country kanpainaren barnean. Orain hilabete batzuk jakin genuen Ertzaintza ibilia dela palestinarren aurka erabilitako teknikak ikasten. Akordio hauek sinatzen dituzten euskal herritarron ordezkariek ongi dakite zer gertatzen den Israelen. Adibide bat nahi izanez gero, ikusi Google-n Hebron herriko irudiak.

AskeGunearen lehen urteurrenean, desobedientzian sakontzeko topaketak

2014-03-27  //  AskeGunea, Desobedientzia zibila, Euskal Herria  //  Iruzkinik ez

AskeGunea Donostian, 2013ko apirilean. (Arg: Askegunea)

Donostiako AskeGunea osatu zela lehen urteurrena betetzear den honetan, Libre Topaketak 0.1 antolatu dituzte Gipuzkoako hiriburuan bertan. Hausnarketa, formakuntza eta eztabaida saio kolektiboa antolatu dute. Beren hitzetan, “donostiarrek eskubide zibil eta politikoen alde duten konpromisoaren islatzeaz gain, gure artean gero eta aipatuagoak diren konpromisoa, desobedientzia zibila, herri erresistentzia edota konfrontazio demokratikoa nola ulertu eta bideratu nahi ditugun elkarrekin hausnartzea proposatzen dugu, gure arteko formakuntzaren saio kolektiboa burutuz”. (gehiago…)

Guarani komunitate baten garaipen txikia Brasilen

2014-03-24  //  Guaraniak  //  Iruzkinik ez

Guaraniak beren lurretara itzulera ospatzen (Arg: Survival)

Brasilgo Guarani komunitate batek, urteetako borrokaren ostean, lortu du beren lurretara itzultzea, bertan zeuden baserritarrak mugituz. 200 bat dira indigenak, Survival guneak jakinarazi duenez. Baserritarren eta herrialdeko sistema judizialaren aurkako borrokan ia etsirik, zera adierazi zuten 2012an, desesperaziotik gertu: “Hil gaitzazue guztiak eta ondoren lur hauetan ehortzi“. (gehiago…)

Maputxe herriari barkamena eskatu dio Txileko Estatuak, jarrera erabat aldatuta

2014-03-14  //  Estaturik gabeko nazioak, Wallmapu  //  Iruzkin bat

600.000 bat maputxe bizi dira Txileko estatuaren hegoaldean. (Arg: Agencia Uno)

Txileko lehen ministro berria indartsu hasi da, Michelle Bachelet. Hauteskundeak irabazi eta biharamunean Maputxe herriari barkamena eskatu dio, Estatuaren ordezkari hautatu berriaren bitartez:

“Maputxe herriari barkamena eskatzera nator Txileko Estatuak bere lurrak ostu zizkiolako; eta baita ere urrutitik etorritako kolono eta beren ondorengoei ere, gure herrialdean beren bizitza eraiki dutenak, Txileko estatuak aproposa ez zen lurralde batera ekarri zituelako une desegoki batean (…)  Hau konpontzeko bidea ez da pertsonen heriotza. Denen heriotzak egiten dit min. Ez dut desenkontru historiko honen kulpaz gure eremu honetan hildako gehiagorik nahi”. (gehiago…)

ANCk bi urte Kataluniako independentzia bultzatzen

2014-03-13  //  Estaturik gabeko nazioak, Herrialde Katalanak  //  Iruzkinik ez

2012ko Diada independentziaren alde.

Kataluniako Assemblea Nacional Catalana (ANC) erakundeak bi urte bete ditu aste honetan. Herri hori independentziaren alde egiten ari den bidea ulertzeko ezinbestekoa da ANCren ekarpena kontuan hartzea. Elkarte hori izan da Kataluniako mobilizaziorik jendetsuenak antolatzeaz arduratu dena: Diada eguneko manifestazioa Bartzelonan 2012an “Katalunia, Europako estatu berria” lemapean, eta 2013ko Bide Kataluniarra independentziarantz.

(gehiago…)

Zeelanda Berrian erreferenduma bandera aldatu ala ez erabakitzeko

2014-03-11  //  Uncategorized  //  Iruzkinik ez

Egungo bandera eta proposamen berri bat.

Zeelanda Berriak erreferenduma egingo du herrialdeko bandera aldatu ala ez erabakitzeko. Lehen ministro John Keyk iragarri du. Egungo banderak bazter batean Erresuma Batuko ikurra du eta herritar askorentzat konnotazio kolonialista du.

“Gure bandera Union Jack-ak dominatzen du, eta gu ez gaude Erresuma Batuak dominatuta. Proposatzen ari naiz Zeelanda Berri modernoak beste pauso bat eman dezala garapenean, eta gure independentzia bandera berri baten bitartez adierazi”.

Lehen ministroak berak adierazi du berari gehien gustatuko litzaiokeena All Blacks errugby taldeak erabiltzen duen Zilarrezko Ira litzatekeela, baina prozesu baten ostean erabakiko dutela ikurra.

Orain urte batzuk lagun Maori batekin gaiaz hitz egitean, adierazi zidan Maori komunitatetik ez dela sekula begi onez ikusi bandera kolonialista hori, eta berak ere All Blacks-en hostoa erabiliko lukeela adierazi zidan. Badirudi nahiko zabalduta dagoen iritzia dela. Sarean dena den jendearen proposamenak dagoeneko aurki daitezke. Ikusiko dugu zer gertatzen den.