Pedro Prieto, konbertsoaren irribarrea
Metakazetaritza dosi txiki bat eskainiko dizuet. Pedro Prietori elkarrizketa egin genion, eta gero, paperera eramateko orduan, arazo bat sortu zitzaigun: tipoak esaten dituenak esaten ditu, eta ia argazki guztietan ageri da irribarretsu. Zelan demontre ezkondu, pentsatu genuen, poztasun irudi hori eta honelako esaldiak: “Ez gara krisi honen aurreko egoerara itzuliko”, “gure bizi-maila %90 jaitsi beharko dugu”, “desazkundea dator, eta horrekin batera kolapsoak”, “ez dago sistema honi eusterik”, “jabetzen hasi behar dugu dauzkagun mugez”…
– Aizu, lur jota utzi nau esan duzunak –bota nion. Nire alaben etorkizunaz pentsatzen ari nintzen, batez ere.
– Halaxe daramat nik hogei urte –erantzun zidan berak.
Oso deigarri egin zitzaidan elkarrizketa (ofizial)eko pasarte bat, espazio faltagatik argitaratu ez genuena. Halako batean, zera esan zidan Prietok:
– Uste dut dagoeneko 100 unibertsitate inguru dagoela Espainian, ez dakit denak beharrezkoak diren. Zertarako? Ingeniariak, arkitektoak, ekonomialariak, enpresa-zientzietan lizentziatuak… isurtzen segitzeko? Jende hori autobideak, abiadura handiko trenak eta abar egiten jarraitzeko hezten dute, honek ez dauka ez hanka ez bururik. Urtero %3 hazteak, Zapatero jaunak proposatzen duen moduan, esan nahi du 25 urtero ondasun eta zerbitzuen ekoizpena bikoiztu behar dela. Eta hamasei aldiz biderkatu, ehun urtero. Zer nahi dugu mende bat barrurako, zein da eredua (ordurako energia geratuko zaigula suposatuz)? Gaur egun baino hamasei aldiz autobide gehiago edukitzea? Hamasei aldiz taberna gehiago? Hamasei aldiz aulki, botila, metro… gehiago? Ez naiz gai hori irudikatzeko. Izan ere, uste dut ezin dugula gehiago hazi.
– Aipatu dituzun lanbideen artean zurea dagoenez gero, barkatuko didazu gordin galdetzea: konbertsoa zara?
– Konbertsoa, eta iraganaz damutua.
Prieto ez da militante ekologista, edo ez ohikoa behintzat. Haren curriculumean ez dira ageri “nuklearren kontrako borrokan eskarmentu handia” bezalako esaldiak. Hamarkada asko eman zituen “indarraren alde ilunean”, eta azken hogei urteetan bera noizbait pieza izandako sistema horren zentzugabekeriaz ohartarazi nahi gaitu.
Ia ordu eta erdiz jardun genuen, eta horren erdia ere ez da argitaratu. Askoz gutxiago azken egunotan sarean jarri dugun bideoan. Norbaitek gogoa badu Prietoren mezua sakonago ezagutzeko, www.crisisenergetica.org webgunea arakatzeaz gain, madrildarrak 2009an idatzitako analisi mardul hau (gaztelaniaz dago) irakur dezake. Hein handi batean horretan oinarritu nintzen elkarrizketa prestatzeko, beraz gauza dezente dago errepikatuta. Baina beste batzuk ez, eta hitz ematen dizuet oso interesgarriak direla, aldi baterako gorputzaldi txarra uzten dizuten gauzentzat “interesgarri” adjektiboak balio baldin badu. Irakurri ondoren, argitzeke geratuko zaigun misterioa da zelan eusten dion Pedro Prietok bere irribarreari.
Laupabost urte dira energia krisiari eta crisisenergetica.org webguneari jarraitzen diodala. Itzelak dira agertzen diren analisiak eta izugarriak aurreikuspenak. Ulertzen dut zergatik sistemako kudeatzaileek ez dute inola nahi gai larri hau sozializatzerik, baina ezin ulertu, inola ere, zelan Euskal Herrian ezkerreko erakunde independentziazaleek ez dute ia ezertxo ere aipatzen honetaz. Geroaz ari direla, “independentzia”, “sozialismoa”, eta halakoak bolo-bolo, baina inork ez du aztertzen zelan eragingo duen gurean energia eskasia handi atzera ezinezkoak.
Baina zein obsesio da hau, “ezkerreko erakunde independentziazale”ekikoa? Zer esaten dute eskuinekoek? Zer espainiar zaleek? Euskal ezkerreko erakunde independentziazaleko kide asko espetxean daude; beste asko eta asko, milaka, lanean daude goizetik gauera, azken hamarkada luze eta gogorretan bezalaxe. Militantziari bizitza puta osoa eskainiz kosta zer kosta. Ez dio ezker abertzaleak ingurugiroari arretarik eskaini sekula? Ez dio ardurarik? Nori ardura dio, bada? Nahikoa dugu! Zenbat herri batzarretan egon zara zu, zure kezkaren arrazoiak aurkezten, partekatzen? Zure informazioa banatzen? Zure hausnarketak plazaratzen? Non egin duzu? Aizu: Kritikak bolo-bolo baina ez ditugu zure azterketak entzun, zelan eragingo duen gurean energia eskasia horrek, esaguzu bada, ez?
Bien bitartean, zure zain. Ez hemen: kalean, lanean.