Espainiako kate pribatuek publizitate lehiatik kanpo nahi dituzte telebista publikoak
Publizitatearen irabaziak osorik nahi dituzte eurentzat kate pribatuek
Espainiako telebista kate pribatuek urteak daramatzate legea urratzen publizitate emisioaren alorrean. Eta hara non orain, haiek biltzen dituen UTECA elkarteak ikus-entzunezkoen eremua erregulatzeko neurriak galdatu dituzte. Zenbait ikus-entzule elkarteren ustez, beren negozio-bolumena handitzea du xede eskaera horrek. Izan ere, hasiera batean oso sinpatikoa dirudien zerbait eskatu dute: telebista publikoek publizitaterik ez ematea. Batzuk pozik leudeke telebista publikoek publizitatea neurriz emate hutsarekin ere.
Publizitaterik gabeko telebista publikoa nahi du UTECAk. Ikusle arrunt garenok ere gogaituta gaude hainbeste iragarkirekin -UTECAko kideek prime timen ematen dituzten iragarki sorta amaigabeekin batez ere-, baina hortik den-dena kentzera… AUC espainiar ikus-entzule elkarteak gogorarazten duenez, “kate publikoetan publizitatea guztiz desagertzeak kostu handiagoa ekarriko lieke hiritarrei, eta agian, epe luzeagoan, kolokan jarriko luke telebista publikoaren funtzio soziala”. Bide batez, kate pribatuei esan diete eurek ere badutela funtzio sozial hori betetzeko beharra. Besteak beste, publizitate emisioak, gehienez, orduko 12 minutura mugatzen duen legea aintzat hartuz. Lege hori 1994tik existitzen da Espainiako Estatuan, eta berdina da Europar Batasun osoan. “Espainian, ordutik honako administrazioek ez dute grina handiegirik azaldu hura betearazteko orduan”, salatu du AUCek. Ondorioa gaur egungo saturazioa da. 2004ko txosten baten arabera -gaur egungo datuak ez dabiltza oso urruti-, TVE-1 eta La 2 ziren Europan publizitate gehien ematen zuten hirugarren eta bosgarren kate publikoak, hurrenez hurren. Kate pribatuek, berriz, lege-urratze asko eta zigor gutxi ordainetan. Ez da harritzekoa Europar Batzordeak berriki txostena bidali izana Madrilgo Gobernuari, zorrotzago jokatu behar dutela gogoraraziz. Iaz ere gauza bera esan zieten, gutxi gorabehera, eta ez zen lehenengo aldia noski.
Iruzkinik ez
Trackbacks/Pingbacks