Lehorrean eragin dugun espezie galera itsasoan errepikatzeko zorian gaude

Atalak: Ingurumena

Orain arte itsas espezie gutxi desagertu dira giza jardueraren erruz, baina mende honetan egoerak okerrera egingo du, konponbiderik ezean.

Lehorreko bizidun espezie ugari desagertzea eragin duten faktoreak itsasoetan ere atzematen hasiak dira, Science aldizkarian argitaratutako artikulu batek dioenez. Egileen esanetan, itsas animalia eta landareen populazioak osasuntsutzat jo ditzakegu oraindik, baina baliteke datozen ehun urteetan hori aldatzea.

Azken 500 urteetan, 500 espezie inguru desagertu dira giza jardueraren erruz. Ozeanoetan, eta denbora tarte berean, era horretako hamabost galera baizik ez dira ezagutzen. “Azken batean lehorreko harraparia gara; tximino batentzat zaila da espezie baten desagertzea eragitea itsasoan”, adierazi du Douglas McCauley-k, ikerketan parte hartu duen zientzialarietako batek.

Haatik, kopuru hori asko handitu daiteke mende honetan. Ikerlariek konparatu egin dituzte Industria Iraultzaren bilakabidea eta gaur egun itsasoetan gizakiok dugun jarduera. 1800etik aurrera, lantegiek eta laborantzarako lurrek lekua kendu zieten baso eta belardiei, eta horrek espezie asko desagertzea eragin zuen. Garai bertsuan, arrantza ez zen hain erasokorra: itsasertzetik oso urrun aldentzen ez ziren belaontzietan egiten zen, batez ere. Baina hori asko aldatu da. Eta kontuan eduki behar da, gainera, ozeanoetako biziari presio egiten dion faktore bakarra ez dela arrantza: itsas hondotik baliabideak erauzteko gero eta baimen eskari gehiago dago.

Lehorreko eta itsasoetako bilakabidea konparatzen dituen marrazkia.

“Adierazle guztien arabera, lehorrean diseinatu dugun basa-biziaren Armagedoia itsasoan gertatzeko osagaiak prestatzen ari gara”, esan du Douglas McCauleyk. Ikerlanaren ondorioetako bat da orain baino itsas eremu zabalagoak utzi beharko liratekeela arrantzaz eta garapen industrialaz salbu, hondamendia eragotzi nahi badugu. Baina hori ez da nahikoa izango. Dagoeneko egindako mina konpontzeko neurriak ere eskatu dituzte.

Ez da erraza izango, besteak beste klima aldaketa itsasoetako bizi-baldintzak okerragotzen ari delako –“arrainontzia daukan edonork daki bertako ura berotuz gero eta azidoa botaz gero arrainek arazoak dituztela”–, baina McCauleyren iritziz oraindik ere nolabaiteko osasuna badute planeta honetako ozeanoek. Horrek eman diezaieke salbatzeko aukera, gu kontrakoan tematzen ez bagara.