Pornografia ez da denen begietarako… eta Madril ados dago

Atalak: Hedabideak

Gutxitan ematen dira honelako berriak. Espainiako Gobernuak onartu egin ditu AUC kontsumitzaile elkarteak Ikus-entzunezkoen Lege Orokorraren aurreproiektuari egindako alegazioak. Hala, pornografia eta funtsik gabeko bortizkeria ez dira modu irekian emango, ordutegia edozein dela. Ikusi nahi dituenak gutxienez botoi bi sakatu beharko ditu, baten ordez.

Pornografiari eta bortizkeriari dagozkienak ez ezik, AUCen beste alegazio batzuk ere onartu ditu Gobernuak. Esaterako, babes berezia ezartzea adin gabekoei zuzendutako publizitatean. Era horretan, iragarleek ezin izango dituzte erabili pertsonaia ezagunen irudiak, izan fikziozkoak izan benetakoak, euren produktuak erakargarriago bihurtzeko.

Aintzat hartu dute, halaber, ikus-entzunezko produktu guztiek derrigorrez adinen araberako kalifikazioa eduki beharra, eta Ikus-entzunezkoen Estatuko Kontseiluak izatea kalifikazio horiek kontrolatzeko eskumena (gaur egun, filmen kasuan izan ezik, telebista-kateek askatasuna daukate ematen dituzten programei nahi duten kalifikazioa ezartzeko). Kontseiluak desegokitzat jotzen dituen kalifikazioak aldatzeko eskatu ahal izango du, eta zigorra jarri ahal izango dio eskari horren aurrean “entzungor” agertzen den kateari.