2016rako, poesia kalean

Atalak: Islandiera ikasten

Ekainaren 28an hiru urte beteko dira Donostia Europako Kultur Hiriburu izendatu zutenetik. Hori dela eta, Donostia 2016ren egoitza berriaren ateak ireki egingo dira egun horretan bertan. Donostiako 8 kulturetxek antolatu duten “Oreka” ikuskizunean parte hartuko dut, Loiolako Latsari plazan, 11:30tan. Klara Badiola, Roberto Pacheco eta Miren Agur Meaberekin batera irakurriko ditut poemak, eta gero artejirari jarraituko diogu Via Foran, Mikel Azpiroz eta Jabier Muguruzarekin (17:00tan).

Irakurriko ditudan poema gehienak Islandiera ikasten liburu berritik datoz. Hasteko honako hau aukeratu dut, horrelako ekintzak zergatik egin behar ditugun azaltzen duelakoan.

POETIKA EZ HAIN TTIPIA

Behin batean Lisboan   Baixatik nenbilela
artista ikusi nuen   garrasika plazan

manta baten gainean   bere opera osoa
erosle baten bila   liburuak zeuzkan

nik ez nion erosi   poesia ez da arraina
saldu egiten bada ere   kaleko azokan

musikaren antzera   debalde eskaintzen da
gustuko izan duenak   zerbait eman dezan

diziplinaren bidez   nortasuna eraikiz   
horixe da poetak   jasoko duena

poemak idazteak   ez zaitu aldatuko
baldin ez badituzu   irakurtzen ozen

jendaurrean mintzatzen   ez bazara ausartzen
esaten duten hori   ez baduzu aditzen.

(Doinua: Behin batean Loiolan)