Bideo-instalazioa

Atalak: Poemak

Irudian klik egin GIF animatua ikusi ahal izateko

ANDONI EGAÑAREKIN ESPAÑARA NOALA

Españara baldin bazoaz joe!
pentsatuz joe! gaur beste denek jai
eta nik trenean eguna pasa

seguru aski ez duzu ongi pasako
ez duzu poemarik egingo
bidaia luzea gertatuko zaizu

eta aldiz baldin bazoaz
Españara pentsatuz
jo! ze pribilegio daukadan nik

hemengo bidaiarien bizitza
ikasi dezaket: zer esanik ez
ez didate ezer esango noski

baina eserlekutik mugitu gabe
telefonoz hitz egingo diete
senitartekoei eta amari

lagunei lankideei maitaleei
bezeroei hoteleko objektu
galduak jasotzen dituenari

ikaskide eta seme-alabari
zer esaten dieten entzungo dut
eta jakin nahi ez nuen guztia

jakingo dut galderak egin gabe
eta aurpegia gogortuta apal
eskatuko banie baxuago

hitz egin dezatela edo joan
daitezela bagoien artekora
bertan barruak ozen hustutzeko

ezezkoa emango didate
galdetuz aber nor ostia naizen ni
zer egin behar duten agintzeko

eta ez diet erantzungo baina
poema idatziz lasaituko naiz
Urbiara joan izan banintz bezala

jarrera horrekin baldin bazoaz
jo! eguna ondo pasako duzu.

2016-1-13/17, Donostia-Madril-Coruña

Irudiak: Bertsolari (Txintxua films, 2013)