Aireko kutsadura: europar legediaren zentzugabekeria agerian berriz ere

Atalak: Ingurumena, Osasuna

Trafikoa da aireko kutsaduraren eragile nagusia (Arg.: Shyaulis Andrjus-CC By SA).

The Lancet aldizkari errespetagarrian argitaratu berri dute ikerlana, eta horrek ospe handiagoa ematen dio esandakoari, baina ez pentsa sekulako errebelazioa denik Europar Batzordeak bere legedian ezarritako mugek ez gaituztela behar bezala babesten aireko kutsaduraz. Jakin nahi zuenak bazekien. Etxe honetan bertan, urrunago joan gabe, biga-bostetan aipatua dugu afera: kutsatzaile batzuen kasuan, EBrentzat onargarria dena Osasunaren Mundu Erakundeak (OME) gomendatutako langa baino askoz gorago dago.

Utrechteko Unibertsitateko zientzialarien arabera, PM 2,5 partikulak luzaroan arnastea zuzenki erlazionatuta dago heriotza goiztiarrarekin, baita EBk onartutakoak baino askoz kontzentrazio baxuagoetan ere. Ondorio horretara iristeko, Rob Beelenek zuzendutako taldeak 22 ikerketa aztertu ditu, 365.000 pertsona ingururen datuak biltzen dituztenak. Nabarmendu dutenez, aireko kutsaduraren eta heriotzaren arteko harremana argiro azaltzen da tabakoa, estatus sozioekonomikoa, ariketa fisikoa eta bestelako aldagaiei dagokien “doiketa” egin eta gero ere. Artikuluaren egileak busti-edo dira, eta OMEk gomendatutako mugei jaramon egiteko iradoki dute.

Orain, zuri dagokizu Beelenek eta haren lankideek esandakoa sinestea edo funtsik gabeko alarmatzat jotzea, gerta baitaiteke hori ere entzutea hemendik gutxira. Zeren, zientzia aldizkari prestigiotsuek ematen duten sinesgarritasuna irabazi bezala galdu egin baitaiteke. Zure ikerlanaren emaitzak botere handiegia daukan norbaiten koskabiloak ukituz gero, posible da argitaratu dizuten artikulua desargitaratzea.