Neighbor Hernanin eta Donostian

Atalak: Paisaiak

Badago Hernanin toki berezi bat, Leoka labaderoa, non emakumeek arropa garbitzen zuten. Gaur egun, Emakumeentzako Jabetze Eskolei hasiera emateko, Leokan emanaldi bereziak antolatzen dituzte Hernaniko Udal Berdintasun Arloak eta Berdintasun Kontseiluak. Antzina emakumeen topaleku, lantoki eta kontutoki izan zen espazioan, emakumeei eman nahi zaie protagonismoa berriz ere, Leoka emakumeentzako berreskuratuz eta beste espazio batzuetan egiten den lan ikusezina omenduz.

Hernaniko emakume artista baten lana ezagutu eta gozatzeko abagunea izan zen Leoka aurten ere, Neighbor talde bikainari esker. Hona hemen irailaren 20an egindako kontzertuko 10 minutu, hiru kantu, hiru hizkuntza (Little river / Bici / Maitemintzea). Maite Larburuk eta Josh Cheathamek osatutako bikoteak bi emanaldi eskainiko ditu Donostian (urriaren 30ean, Lugaritz kulturetxean) eta Hernanin (31ean, Biterin).

(Maiteri eskerrak bideo hau erabiltzeko baimenarengatik. Bide batez: Asier Altunaren Zela Trovke laburmetraia ere ikusgai izango da Hernaniko saioan.)