Poem recording Islandian
Reykavík-eko portuko auzoan zehar, 2015eko maiatzean
Graphic recording deitzen zaio mintzaldiak zuzenean irudikatzeko metodologiari, comic-etik eta pop-art-etik hartutako tekniken laguntzaz. Gurean Pernan Goñik oso ondo egiten du, hemen erakusten duen moduan. Oso erabilgarria da bileretan, batzarretan, kongresutan etab.
Duela gutxi entzun nuen graphic recordingez gain, poem recording ere interesgarria izan zitekeela. Metaforen eta poesiaren beste baliabide batzuen bidez, mintzaldi batek ematen duena islatzeko eta gizarteratzeko beste modu bat izan daitekeelakoan, oso ideia ona iruditu zitzaidan. Etorkizunean gehiago ikusiko dugulakoan nago. Jakinminak bultzatu nau eskua trebatzeko saiakera bat egitera, Islandian, demokraziari buruzko kongresu batean parte hartzen ari nintzela.
Vilhjálmur Árnason
Workings of Democracy:The Case of Iceland
2015eko maiatzaren 27an, Reykjavík-en
Hainbat arazo daude demokrazian
eta gure lapiko-iraultzaren sagak
hedatu dira; istorioak, haizeak
bezala, ugari dira Islandian
baina non dago gure erresistentzia?
Horra bi mila eta zortziko krisia.
Jende gutxi gara irlan, eta krisia
kudeatu genuen demokrazian.
Higatu zen gure erresistentzia.
Nor da erruduna? Diru-gosea? Sagak?
Prozesu sakonak egungo Islandian.
Erantzuna nork du? Akaso haizeak.
Bob Dylan ahaztu, mesedez. Haizeak
dena eraman du, dirua eta krisia.
Gazteen itxaropenak Islandian
interneten daude, ez demokrazian.
Haurren moduan maite ditugu sagak:
haiek ematen digute erresistentzia.
Gure izotzezko erresistentzia
nola indartu? Itzuliko den haizeak
jotzen bagaitu, esango al digu sagak
nola gainditu ahalko dugun krisia?
Dirauen prozesuak demokrazian
erro sakonak ditu gaurko Islandian.
Konektatuta, beti lehian, Islandian
elkarri egiten diogu erresistentzia.
Horrek eragiten du demokrazian.
Subjektu bako prozesua, haizeak
daroa. Berriro baletor krisia
berriro idatziko genituzke sagak.
Hitz egiteko ohitura da sagak
mendez mende eratu duena Islandian.
Hitz truke bakoitzean dautza krisia
eta aurre egiteko erresistentzia.
Baina norekin, non, nola, noiz? Haizeak
bozak aldatzen ditu demokrazian.
Demokrazian dirauten sagak eta
haizeak Islandian jotzen dutenean,
erresistentzia ezak krisia dakar.
Reykjavík street-art-ez beteta dago, hemen portuko beste bat
(Zer arraio-forma erabili dudan hemen? Bada, sextina bat. Ez seiko handia; hori bertso edo ahapaldi mota bat da. Okzitanian asmatutako sextina da poema oso bat egiteko mekanismo konplexua; Joan Brossak egiten zituen katalunieraz, baina nik dakidala euskaraz ez da inoiz erabili edo argitaratu.)
Iruzkinik ez
Trackbacks/Pingbacks