Euskal Herriko itzulia 12 poematan, Gasteizen

Atalak: Paisaiak, Poemak, Poesia gizarteratzen

Iaz Sautrelan eginiko elkarrizketaren amaieran, Hasier Etxeberriak galdetu zidan aurrera begira beste proiekturik ba al nuen. Erantzun nion, gutxi gorabehera, poesia gizarteratzeko lanetan jarraitzea gustatuko litzaidakeela, poesia elitista izan ez dadin. Eutsi diot egitasmoari?

Bide horretan orain arte saiatu naiz poesia eta beste jarduerak elkartzen –adibidez medikuntza eta poesia, edo geografia eta poesia– eta Jose Luis Padronen laguntzaz irratiaren bidez hedatzen, Lizardiren baratzan. Hemendik aurrera, hizkuntzak eta komunitateak ere hurbildu nahiko nituzke. Ni elebakarra izan naiz eta badakit komunitate erdaldunetan zer gutxi ezagutzen den euskaraz egindako literatura. Nahiko nuke euskal poesiari buruzko zerbait egin gaztelaniaz, “galtzen ari zareten hori” ezagutarazteko.

Aste honetan bi helburu horiek batu nahi dituen poesia irakurraldi bati ekingo diot: Euskal Herriko itzulia 12 poematan izenekoa, Gasteizko Poetak maiatzean jaialdiaren baitan. Ideia sinple da: jatorriz euskaraz idatzitako poemak euskaraz irakurriko ditut, baina azalpenak gaztelaniaz emango ditut. Erdaldunak ez uxatzeko, poemen itzulpenak ere jarriko ditut pantailan, azpitituluen moduan, publikoak irakur dezan. Irudi batzuekin batera, poema guztien artean egungo Euskal Herriaren irudia emango da, paisaiaren edo lekuaren inguruko gogoeta eskainiz.

Honako hauek dira irakurriko ditugun 12 poemen egileak: Iñigo Astiz, Joseba Sarrionandia, Kirmen Uribe, Bernardo Atxaga, Jon Gerediaga, Rikardo Arregi, Miren Agur Meabe, Paddy Rekalde, Koldo Izagirre, Luzien Etxezaharreta, Aurelia Arkotxa eta Gerardo Markuleta. Talde ederra! Sokaren etxera (Aiztogileen kalea, 24) etorri asteazkenean, maiatzaren 18ko 18:00tan, eta ikusiko dugu.